విశాఖపట్నం : తిరుపతి జిల్లా నాయుడుపేటలో రూ.4 వేల కోట్ల పెట్టుబడితో భారీ బ్యాటరీ ముడిపదార్థాల తయారీ పరిశ్రమ ఏర్పాటు కానుంది. భారత్‌కు చెందిన కార్బన్ రిసోర్సెస్ ప్రైవేట్ లిమిటెడ్ (CRPL), దక్షిణ కొరియాకు చెందిన కాస్మో ఏఎం అండ్ టీ (COSMO AM&T) కంపెనీలు సంయుక్తంగా ఈ పరిశ్రమను నెలకొల్పనున్నాయి.
కార్బన్ కాస్మో అడ్వాన్స్‌డ్ మెటీరియల్స్ ప్రైవేట్ లిమిటెడ్ పేరుతో ఏర్పాటు చేయనున్న ఈ పరిశ్రమ ద్వారా ప్రత్యక్షంగా 700 మందికి, పరోక్షంగా మరో 3,500 నుంచి 5 వేల మందికి ఉపాధి అవకాశాలు లభించనున్నాయి.
విశాఖపట్నంలో జరగనున్న సీఐఐ భాగస్వామ్య సదస్సు నేపథ్యంలో బుధవారం రాష్ట్ర విద్య, ఐటీ, ఎలక్ట్రానిక్స్ శాఖల మంత్రి నారా లోకేష్‌తో కార్బన్ కాస్మో సంస్థ ప్రతినిధులు సమావేశమయ్యారు. ఈ సందర్భంగా పరిశ్రమ ఏర్పాటు, పెట్టుబడులు, ఉత్పత్తి సామర్థ్యం, భవిష్యత్తు విస్తరణ ప్రణాళికలపై చర్చించారు.
230 ఎకరాల్లో మూడు దశల్లో పరిశ్రమ ఏర్పాటు
నాయుడుపేటలో 230 ఎకరాల విస్తీర్ణంలో దక్షిణ కొరియాకు చెందిన కాస్మో సంస్థ సాంకేతిక పరిజ్ఞానంతో ఈ పరిశ్రమను ఏర్పాటు చేయనున్నారు.
ఎలక్ట్రిక్ వాహనాలు, ఇతర అవసరాలకు వినియోగించే లిథియం అయాన్ బ్యాటరీల తయారీలో కీలకమైన ఫెరిక్ ఫాస్ఫేట్ (FP), లిథియం ఐరన్ ఫాస్ఫేట్ (LFP) క్యాథోడ్ పదార్థాలను ఇక్కడ ఉత్పత్తి చేయనున్నారు.
మూడు దశల్లో పరిశ్రమ నిర్మాణాన్ని పూర్తి చేయాలని సంస్థ లక్ష్యంగా పెట్టుకుంది. మొదటి దశలో ఏటా 30 వేల టన్నుల ఫెరిక్ ఫాస్ఫేట్, 30 వేల టన్నుల లిథియం ఐరన్ ఫాస్ఫేట్ ఉత్పత్తి సామర్థ్యంతో 2028 మధ్య నాటికి ప్లాంట్‌ను అందుబాటులోకి తీసుకురానున్నారు. 2031 నాటికి మూడో దశను పూర్తి చేసి పూర్తిస్థాయి ఉత్పత్తి ప్రారంభించాలని ప్రణాళిక రూపొందించారు.
మూడు దశలు పూర్తయిన తర్వాత ఏటా 1.8 లక్షల టన్నుల ఫెరిక్ ఫాస్ఫేట్, మరో 1.8 లక్షల టన్నుల లిథియం ఐరన్ ఫాస్ఫేట్ తయారు చేయనున్నారు. ఇందులో ఏటా 1.3 లక్షల టన్నుల వరకు ఉత్పత్తులను విదేశాలకు ఎగుమతి చేసే అవకాశం ఉంది.
ఈ పరిశ్రమ ఏర్పాటుకు సంబంధించి అక్టోబర్ 16, 2026న అమరావతిలోని ఎస్ఆర్ఎం యూనివర్సిటీలో అవగాహన ఒప్పందం కుదిరింది. నవంబర్ 6న జరిగిన రాష్ట్ర పెట్టుబడుల ప్రోత్సాహక మండలి (SIPB) సమావేశంలో ఈ ప్రాజెక్టుకు ఆమోదం లభించింది.
బ్యాటరీ తయారీ రంగంలో ఏపీకి కీలక పెట్టుబడి
కార్బన్ కాస్మోలో భాగస్వామిగా ఉన్న కోల్‌కతాకు చెందిన కార్బన్ రిసోర్సెస్ ప్రైవేట్ లిమిటెడ్ ఇప్పటికే విజయనగరం జిల్లా బొబ్బిలిలో కాల్సిన్డ్ పెట్రోలియం కోక్ తయారీ పరిశ్రమను నిర్వహిస్తోంది.
మరో భాగస్వామి అయిన దక్షిణ కొరియాకు చెందిన కాస్మో ఏఎం అండ్ టీ బ్యాటరీ క్యాథోడ్ పదార్థాల తయారీలో అంతర్జాతీయంగా గుర్తింపు పొందిన సంస్థ. శామ్‌సంగ్ ఎస్‌డీఐ, ఎల్‌జీ ఎనర్జీ సొల్యూషన్ వంటి ప్రముఖ బ్యాటరీ తయారీ కంపెనీలకు ఈ సంస్థ ఉత్పత్తులను సరఫరా చేస్తోంది.
ఈ రెండు సంస్థల భాగస్వామ్యంతో నాయుడుపేటలో ఏర్పాటు కానున్న పరిశ్రమ దేశీయంగా బ్యాటరీల తయారీకి అవసరమైన కీలక ముడిపదార్థాల లభ్యతను పెంచడంతో పాటు విదేశీ దిగుమతులపై ఆధారపడటాన్ని తగ్గించేందుకు దోహదపడనుంది.
ఐఐటీ తిరుపతితో కలిసి పరిశోధనలు చేపట్టాలి
ఈ సందర్భంగా మంత్రి నారా లోకేష్ మాట్లాడుతూ బ్యాటరీల తయారీతో పాటు పరిశోధన, సాంకేతిక అభివృద్ధికి కూడా ప్రాధాన్యం ఇవ్వాలని సూచించారు.
బ్యాటరీ క్యాథోడ్ పదార్థాల నాణ్యత పరీక్షలు, వినియోగించిన బ్యాటరీల నుంచి విలువైన పదార్థాలను తిరిగి సేకరించే రీసైక్లింగ్ సాంకేతికతపై పరిశోధనల కోసం ఐఐటీ తిరుపతితో కలిసి ప్రత్యేక ప్రయోగశాల ఏర్పాటు చేసే అవకాశాలను పరిశీలించాలని కాస్మో సంస్థ ప్రతినిధులను కోరారు.
ఎలక్ట్రిక్ వాహనాలు, బ్యాటరీల తయారీకి ఏపీని ప్రధాన కేంద్రంగా తీర్చిదిద్దుతాం: మంత్రి లోకేష్
“కార్బన్ కాస్మో సంస్థను ఆంధ్రప్రదేశ్‌కు ఆహ్వానించడం ఎంతో సంతోషంగా ఉంది. భారత్–దక్షిణ కొరియా భాగస్వామ్యంతో ప్రపంచస్థాయి బ్యాటరీ క్యాథోడ్ తయారీ సాంకేతికత నాయుడుపేటకు రానుంది. దేశంలో బ్యాటరీల తయారీకి అవసరమైన కీలక ముడిపదార్థాల సరఫరాలో ఉన్న లోటును భర్తీ చేసేందుకు ఈ పరిశ్రమ దోహదపడుతుంది.
ఎలక్ట్రిక్ వాహనాలు, బ్యాటరీల తయారీ రంగంలో ఆంధ్రప్రదేశ్‌ను దేశంలోనే ప్రధాన కేంద్రంగా తీర్చిదిద్దాలన్నది మా లక్ష్యం. ఈ పరిశ్రమ ఏర్పాటుకు రాష్ట్ర ప్రభుత్వం అన్ని విధాలా అండగా నిలుస్తుంది” అని మంత్రి నారా లోకేష్ పేర్కొన్నారు.
ఈ సమావేశంలో కార్బన్ రిసోర్సెస్ గ్రూప్ మేనేజింగ్ డైరెక్టర్ అభినవ్ కుమార్ జలాన్, కాస్మో ఏఎం అండ్ టీ వైస్ ప్రెసిడెంట్ డ్యూక్ క్యూ పార్క్, జనరల్ మేనేజర్ బ్యోంగ్‌డే కిమ్, అమన్ కపూర్, సియుంగ్ జోంగ్ లీ తదితరులు పాల్గొన్నారు.
